ఆరోగ్య ఆంధ్రప్రదేశే లక్ష్యం.. యోగాపై సీఎం చంద్రబాబు కీలక ప్రకటన

అంతర్జాతీయ యోగా దినోత్సవం సందర్భంగా విజయవాడలోని ఇందిరాగాంధీ మున్సిపల్ స్టేడియంలో నిర్వహించిన వేడుకల్లో ముఖ్యమంత్రి నారా చంద్రబాబు నాయుడు పాల్గొన్నారు. యోగా గురువు రామ్‌దేవ్ బాబాతో కలిసి ఆయన ఈ కార్యక్రమంలో పాలుపంచుకున్నారు. ఈ సందర్భంగా ముఖ్యమంత్రి మాట్లాడుతూ.. రాష్ట్రంలోని ప్రతి ఇంటికీ యోగాను చేరవేసేందుకు ప్రభుత్వం కట్టుబడి ఉందని, ‘ఆరోగ్య ఆంధ్రప్రదేశ్’ నిర్మాణమే తమ ప్రధాన లక్ష్యమని స్పష్టం చేశారు.

ప్రజారోగ్యాన్ని దృష్టిలో ఉంచుకుని గ్రామ, వార్డు సచివాలయాల పరిధిలో శాశ్వత యోగా మందిరాలను నిర్మిస్తామని చంద్రబాబు ప్రకటించారు. యోగా కార్యక్రమాల పర్యవేక్షణ కోసం జిల్లా, మండల స్థాయిల్లో ప్రత్యేక అధికారులను నియమించనున్నట్లు తెలిపారు. అంతేకాకుండా, 'యోగాంధ్ర' పేరుతో ఒక ప్రత్యేక పోర్టల్‌ను అందుబాటులోకి తీసుకువస్తామని, ప్రామాణిక యోగా పద్ధతులను రూపొందించేందుకు నిపుణులతో కూడిన బృందాన్ని ఏర్పాటు చేస్తామని ఆయన హామీ ఇచ్చారు.

యోగాకు ప్రపంచవ్యాప్తంగా 190 దేశాల్లో గుర్తింపు తీసుకువచ్చిన ప్రధానమంత్రి నరేంద్ర మోదీకి ఈ సందర్భంగా చంద్రబాబు ధన్యవాదాలు తెలిపారు. ప్రధాని మోదీ నాయకత్వంలో భారత్ ‘విశ్వగురువు’గా ఎదుగుతోందని కొనియాడారు. యోగాను సామాన్య ప్రజలకు చేరువ చేయడంలో రామ్‌దేవ్ బాబా కృషి అమోఘమని ఆయన ప్రశంసించారు.

ఆధ్యాత్మికత, యోగా సాధన ద్వారానే 'హెల్తీ, వెల్తీ, హ్యాపీ ఆంధ్రప్రదేశ్' సాధ్యమవుతుందని ముఖ్యమంత్రి పేర్కొన్నారు. జంక్ ఫుడ్‌కు దూరంగా ఉండాలని ఆయన ప్రజలకు పిలుపునిచ్చారు. రాష్ట్రవ్యాప్తంగా ఆగస్టు 15వ తేదీ నుంచి 'సంజీవని' ప్రాజెక్టును అమలు చేస్తామని, అందులో యోగాను అంతర్భాగం చేస్తామని వెల్లడించారు. వచ్చే ఏడాది అంతర్జాతీయ యోగా దినోత్సవ వేడుకలను తిరుపతిలో నిర్వహిస్తామని తెలిపారు. ప్రతి ఒక్కరూ నిత్యం గంట సమయం యోగా, ధ్యానం కోసం కేటాయిస్తే ఆసుపత్రులకు వెళ్లాల్సిన అవసరం ఉండదని చంద్రబాబు సూచించారు.